பயிர்கள் எழிலாய் அதனால் ஆடும்!

அரியின் அரியை அரிப்பெற்
றொளிர...
அரியின் அரியை அரிப்பெற்று 
மிளிர...

அரிமேல் இருக்கும் அரியின் 
மனமோ...
அரியுண்ட அரியாய்மாற;         அரியின் ஓரம்...

அரிஅரி அரிகள் இசைஎழப் 
பாடும்...
அரிகளும்  அரியாய்  நாணி
அதில் ஆடும்...

விளக்கம்:

சூரியனின் ஒளியை, 
சந்திரன் பெற்றொளிர...

சந்திரனின் ஒளியை,
ஆறு பெற்று மிளிர...

கட்டில்மேல் இருக்கும்,
அரசனின் மனமோ...

கள்உண்ட வண்டாய்,
மாற; சோலை ஓரம்...

அழகான வரிவண்டுகள்,
இசைஎழப் பாடும்;

நெற்பயிர்கள் எழிலாய்,
அதில் ஆடும்!

குறிப்பு:

'அரி' என்ற சொல்லுக்கு 
முறையே தமிழில் -

சூரியன், ஒளி, சந்திரன், ஆறு,
கட்டில், அரசன், கள்(ளு), 
சோலை, அழகு, வரி, வண்டு 
நதி, நெற்கதிர், இவை யாவும் 
பொருளாம்.